|
| 確診市民不斷湧到公立醫院求醫，醫護壓力爆煲。 |
中評社香港2月26日電／大公報報道，近日新冠肺炎確診人數呈幾何級數上升，大批患者迫爆公立醫院，令本來已不堪負荷的前線醫護壓力爆煲。一名已退休卻重返前線的63歲公立醫院急診室醫生致函《大公報》，盡訴前線醫護辛酸，並強調“唔少人都瀕臨崩潰”，直至中央宣布全力援港才為他們帶來希望。他期望特區政府動員全社會的力量，盡快戰勝疫情。
以下為該名醫生的信件全文：
自從兩年前新冠疫情爆發以來，我哋前線嘅工作一直車輪轉未停過。原本我三年前就退休了，但疫情一波接一波，啲同事嗌曬救命，所以我都返嚟幫下手。
但今次第五波嘅嚴重程度遠遠超乎我哋想像，呢段時間醫院日日爆滿，內外都迫滿病人。醫生同姑娘忙到氹氹轉，連喝水及如廁都無時間，依然忙不過嚟。大家日日都做得好躁，唔少人都瀕臨崩潰。
其實，而家我哋面臨嘅最大困難唔係身體上的負荷，而係精神上，對前路缺乏信心。唔少同事都越做越灰，因為覺得疫情見唔到盡頭，佢哋同我感慨話：“而家特區政府都控制唔到疫情，我哋仲可以做啲乜？咁嘅日子仲要過到幾時？”
醫護亦都係人，都會有情緒。好在而家中央全力支援香港，聽到各地方艙醫院陸續開工，我哋都好興奮，希望援兵快啲到。不過，對於中央支援嘅每日進展，如果相關資訊每日有個統一發放嘅渠道，我諗會更加清晰。同時我哋都期望特區政府動員全社會的力量，盡快戰勝疫情。
最後，要多謝《大公報》持續為我哋發聲，近日無論係“動員學護上前線”，抑或係“急診室直擊”嘅報道，都講出咗我哋嘅心聲，講出咗前線醫護面對嘅最真實情況。希望《大公報》越辦越好！
一個公立醫院退休急症室醫生 |
